آه يا شطوط التوت شعر/ سمير الأمير

آه يا شطوط التوت
نفسى ادوق من تانى طعم الحواديت
واشم ريحة البيوت
نفسى انام ع الفرن زى زمان
فى حضن العجين..الأمان
العجين.. الحنان.

يادى الحنين الجنان
يادى الحنين اللى خدنى من سنين
داست على وش السنين
من بعد اللى فات فى القلب
جفف خلايا الروح
انا دلوقتى مين؟


يجوز أكون مدبوح ومش دريان؟
طب سندونى ع الوجع يمكن
أكون عيان ...

أيوه أكيد عيان ما نيش ميت
ما دمت لسه باحن بالماضى
وبحس باللى جى
وببص حواليا ومش راضى
الحزن ده يشهد بإنى حى