يا دنيتى ودينى ** شعر /سمير الأمير

يا دنيتى ودينى
شعر / سمير الأمير
على حسابك يقع مطر الكلام
حواديت وأوهام
وعشم نشوف وشك بينده علينا
على حسابى با موت عيان
واموت محروق واموت غرقان
وانا مش من بقيت عدوينك
ياست الحُزن
عشان ترمينى للأحزان
أنا ضحكة عنين المشتاقين ليكى
بحة هتاف المؤمنين بيكى
أنا من صحابك يا سارقانى من دمى
وم الإحساس بشرايينى
يا دنيتى ودينى
وسفرى ورجوعى
ياسر شدة قامتى قُصاد القهر
و رفضى لخضوعى المؤجل
منذ انتصار الخوف ع الميتين
وصعود اللى جابوا الرمل للوادى
على اكتاف الشجر والطين

سايق عليكى كرامات الأوليا والأنبيا والملحدين
ماتحبسنيش فى صوت ما هوش صوتى
ولاتندهيش عليا وانا بين إيديكى
عشان ما أموتش بحسرتى على نفسى
أو ع الأقل ا شد رحالى ف سكوتى
واتوه فى غُربة الأحاسيس.