ما تسيبوا ورق الشجر للريح

ما تسيبوا ورق الشجر للريح
شعر/ سمير الأمير
فى ذكرى ثورة يوليو
القافيه تحكم فين والمدى مزحوم
بحروف وجع وأنين ضمير مكتوم
خمسين سنه والثورة كانت أمانى
خمسين سنه لسه المريض بيعانى
والفقرخلف عيال زُعما بعمم ودقون
وعيال بتكتب شعر مش موزون.
خمسين سنه تانين ف حضن الناس
واللى بيبنى لابد يرمى أساس
تقف العساكر على حدود البلاد
ويسيبوا شغل المكاتب للبنات والولاد
ويسيبوا ورق الشجر للريح
مش كل حاجه بتمشى بالتصاريح
مش بالأوامر يتخلق معنى
ولا بلأغانى نداوى أوجاعنا.
خليهاِ ترجع تانى سكك التمنى
وتغزل الأحلام شمسها بتأنى
تبقى الغيطان خضرا والمكن شغال
والعدل يبقى علم فى دولة العمال.